I bin komplett zua, voi blockiert, des is a Wahnsinn. Ka Theater, des is unpackbar.
I kennt heut a Frolein kenna lerna, die was ma gfallen tuad und die kenntat ma no so sympathetisch sei und mir kennt`n uns treffen, mitanander in Tiergarten geh oder ins Kino oder waß der Teifl wohin, aber unmöglich, dass da mehr draus werden kennt. I man, a wenn die Dame jetzt vielleicht sogar sehr interessant warad, so von ihrer Art her, i kenntat des Interesse ned amoi signalisieren, i miaßad des total unterdrücken. Für mehr als Freundschaft reichts afoch nimma bei mir und trotzdem fehlt ma was. Irgendwas stimmt ned mit mir, des is, wia wenn wos ogsturb`n wa in mir. Der Wunsch, no amoi zum Leben zu erwachen warad ja da, dass mei letzte Liebe wirklich mei Letzte gwesen sei soi, kann i ganz schwer akzeptieren, aber irgenwie hab i so a dunkle Ahnung, des wird nix mehr in dem Daseinszyklus. Des is, ois warad`n die Areale im Hirn, die für`s verliab`n zuaständig san, total durchbrennt bei mir. So fühd sa si irgendwie an.
Ned, dass i jetzt wegen dem verzweifeln tat, des is halt so; lebt ma halt ohne dem Verliebtheitswahnsinn irgendwie durch den Tag und pflegt an andern Wahnsinn, is ja wurscht. Geht a so ganz guad, hab eh ollawäu was z`tuan. Heut hab i mei Eingangstür fertig gstrichen und an Patschen am Radl pickt, bei Freind hab i an Kurzbesuch gmacht. Nur manchmal denk i ma halt:
Oida, du bist ja frank scho a richtige Leich.
Wahrscheinlich muaß i afoch nur amoi realisiern, dass vurbei is. Aus und Ende, ohackl`n des Thema, den Schalter im Hirn komplett umlegen und fertig. Afoch nimma dran denken, das da no irgendwas renna kennt in der Richtung. Des geht scho, wenn ma si a bissl bemüht. 55 bin i eh scho, a paar gescheiterte Versuche hab i a hinter mir, oiso, was wü i mehr.
Fang i halt zum Briafmarkensammeln an, is a recht spannend.