Lonewolfisch

[LoneWolf]

Klar, wenn ma si amoi mit so an Dreck umanander gschlagen hat,
dann is ned wirklich verwunderlich, dass hin und wieder solche Gedanken aufkumman.

Da is die Option, daß ka Ruah is, daß wieder wos ausbrechen wü, ganz automatisch mit an Bord.
Solche Gedanken kann ma nur weida ziag`n lassen, sunst nix.
Neutralisier`n halt, wia den ganzen Dämon, in dem ma versucht, ned dran z`denken,
aber niemals mit Gewalt eliminier`n.

Vielleicht bleibst`s dann irgendwann von selber aus.

So wia mei Lust, mi alle drei, vier Monat deppert z`saufen,
daß i no amoi so lang ned waß, wer i bin und wia`s ma geht.

Des Leiden is weg, i kann`s kaum fassen; dem Universum sei Dank. War eh a schware Geburt.

Die Gedanken beobachten, die zu mir kumman, grad a so, ois ghöradns ned wirklich zu mir, an jeden Einzelnen auf sein Wert und sei Gewicht prüfen, die Unnedich`n wegschicken und weidaziag`n loss`n und die Brauchbaren, des san die, die mi ned owezahn, ghalten.

I leb jetzt und da is nix, wos mi umhaun könnt.

Und wos murg`n mit mir is, is ma heute wurscht.

I kann so denken, i hab kane Kinder.

Hätt i welche, dann wa des womöglich anders.

Musik. Bei Musik entspann i mi am besten.

 

[LoneWolf]

Ja, bei da richtigen Musi kann i mi am besten entspannen.
Da wird so richtig z`samgramt im Schädl drin.

Die Frau Hefele, wia die mit ihr`n Sumsum präzis und unspektakulär den richtigen Ton trifft, phänomenal.

Und beim Pixner seiner Harmonika glaub i manchmal, daß a si um an lebendigen Organismus handelt.

Phänomenal. Wenn i sowas hör, da glaub i ollawäu, i kann nimma in Himmel kumma, wäu i scho durt bin.

 

[LoneWolf]

So, Zeit für a bissl Selbstbeweihräucherung.

A Wahnsinn, i bin ma direkt selber sympathisch, in meiner selbstbeherrschten Art.

I les was im Forum, zum Beispü jetzt, im UF Meditation, mir fallen meine eiganan Samadhizuaständ ei, die i erlebt hab und i denk ma gleichzeitig...

Na, da schreib i jetzt nix dazua.
I mach dena Leut a Freid und halt mei Gosch`n.
A wenn die gar nix mitkriag`n von eahnan Glück.
Und gleichzeitig hüfst a bissl mit, a Ordnung im Forum aufrecht zu erhalten.
Oft denk i ma des in letzter Zeit, is doch selbstlos von mir, oder ned?

Na, kurz erwähnen mecht i des jetzt scho da, jetzt an dera Stö.
Sunst gengan meine positiven Werte komplett unter.

Wird ja immer so hoch gelobt, der Stolz, von die meisten.
"Sei stolz auf di, mach di ned ollawäu so owe..." raten`s ma oft und i frag mi immer...

"Ja gern, aber auf was kennt i des?"

Jetzt hab i endlich was gfunden, auf des i stolz sei kann.

Mei selbstlose, selbstbeherrschte, rücksichtsvolle Art, die wos i eigentlich immer scho als Keim in mir tragen hab und die i da jetzt zur Hochblüte treib, seit i mein Monologthread eröffnet hab.

Nix zu danken, so bin i halt.

I kann ja da a über meine Samadhizuaständ schreiben, wenn`s mi juckt.

Aber zerst hurch i ma no a Liad`l vom Pixner an.
Weltmusik aus den Alpen kennt ma sagen, ned schlecht, der Typ und sei Projekt.
Und die ane oder andere Dame wird vielleicht sogar bemerken,
dass der Gitarrist vom Pixner fast so fesch is wia i und,
was i neidfrei anerkennan muaß, sogar a klan`s bissl
besser Gitar spün kann wia i, wos für meine Uhrwaschln a große Freid is.

Na, is scho a Traum, wie die Stromgitar guad mit der diatonischen Harmonika z`samkummt.

 

[LoneWolf]

Leider muaß i scho wieder passen.

A wenn ma mit da modernan Positronenemissionstomografie demonstrier`n kann, daß spezielle Hirnareale beim intensiv`n Nochdenk`n a forcierte metabolische Akivität aufweisen, bin i söber leider ned wirklich in der Lage zu explizier`n, wia diese zerebralen Stoffwechslprozesse den spezifischen Inhalt von Gedanken

G E N E R I E R E N

​

I hab nur a dunkle Ahnung, wia meine Gedanken generiert werden.

Zum an is der Grad der Einsamkeit, oiso des "zurück geworfen sein" auf mi söba, sehr ausschlaggebend, bei der Generierung meiner Gedanken. Durch des, daß i ka Frau hab, mit dera i mi austauschen tua, generier i ganz andere Gedanken, ois i`s tuan tät, wenn i ane hätt.

Manchmal is des guad, dann wieder ned a so.

A wenn i mit Freind da sitz und tratsch wirkt si des auf die Gererierung aus. Im klassischen Männergespräch generier i ganz anders ois wenn i mit ana Dame z`sam generier. Wenn dann no - womöglich auf Grund von ungebremster Pheromonausschüttung - a gewisse Zuneigung zu der Dame entsteht, wos in der Vergangenheit durchaus scho manchmal vurkumma is, generiert sa si glei no amoi so leiwand.

Peripher wirkt si natürlich a die persönliche Gschicht auf die Generierung der Gedanken aus. Nachdem i ja mit fufzehne (15) am Alk hänga blieben bin und im ersten Durchgang bis sechsazwanzg (26) durchgsoffen hab, hab i andere Gedanken generiert, ois a paar von meine anständigen Freind, die ahna Leben ned dem Dauerrausch gewidmet, nur selten oder gar ned Alkohol konsumiert und die Erfüllung und große Liebe wo ander`s gsuacht haben.

A während die zehn Jahr nachher, wo i nix mehr gsoffen hab, hab i andere Gedanken generiert, ois ana, der nie sei Leben verpokert, ganz afoch, wäu i an urndlichen Misthaufen, sprich: a gschissane Vergangenheit, zu bewältigen ghabt hab. Des wirkt si ollas auf die Generierung der Gedanken aus.

Die Art und Weise wie ma generiert, des fangt scho als Kind an und hängt a vom Elternhaus ab. I hab an Freind ghabt, dem sei Voda war a Häfenbruada, naja, wegen seiner Neigung zur sinnlosen Gewalt halt, und a Tschecherant dazua. Der hod mein Freind und seiner Mutter olle Tag den Herrn zag`n miaß`n, wenn er fett hamkumma is. Klar hat mei Hawara andere Gedanken generiert ois i, wäu mei Mama war nie im Häfen und immer leiwand zu mir. Scho a streng, aber durchaus gerecht und ka Freindin von sinnloser Gewalt.

Und i bin a so wur`n, zumindest wos des Zweite betrifft. Gerecht bin i ned immer, aber sinnlose Gewalt hab i a nie wirklich verstanden. Bis i vierzehne war. Nachdem mi die drei Typen ins Gebüsch zaht und ghaut haben, wia ma normalerweis a kan Tanzbären prügelt, so lang und fest, daß i glaubt hab, die drahn mi ham und i mi vur Angst bis über`s Kreuz angschissen hab, hab i a wieder andere Gedanken generiert ois vurher. Da hab i dann angfangen, die sinnlose Gewalt a bissl zum studier`n. Zum studiern, wohlgemerkt, ned zu praktiziern. Da bin i dann in die entsprechenden Hütten ganga und hab ma des Gsindl amoi aus der Näch`n angschaut. Hab mein Focus oiso auf a ganz bestimmtes Milieu ausgricht und des Milieu wiederum beeinflusst sehr maßgeblich die Generierung der Gedanken.

Naja, so vergeht des Leben und ma generiert und generiert und hofft, daß ma irgendwann amoi a wos kapiert. Ma generiert in der Gemeinschaft, generiert im Dialog, ma generiert auf Tee oder Kaffee, mit an Glas`l Wossa, auf Bier oder Wein, ma generiert auf THC oder Psilocybin, zu zweit, zu dritt oder alla daham in einem Monolog. Scheißegal...

Ma generiert und generiert, solang, bis ma krepiert.
Und oft is leiwand und manchmal a Jammer.

Und trotzdem bin i söba ned in der Lage, zu explizier`n, wia diese zerebralen Stoffwechslprozesse den spezifischen Inhalt von Gedanken generieren.

Nur ans kann i mit Sicherheit sagen: Musik unterstützt mi sehr dabei. Manchmal in anregender Weise, dann wieder, wenn der Generator scho ziemlich am Kochen, oder gar am Durchbrenna is, in sehr beruhigender Art.

I bin wirklich sehr froh, daß diese vülen, genialen Musiker gibt, die so super Tonfolgen

G E N E R I E R E N ​

 

[LoneWolf]

Grad bin i g`sessen am Thron beim morgendlichen Gschäft, und wos is?

Fallt ma wieder mei Leben ei, a Rückblick quasi, genau am passenden Ort zur richtigen Zeit.

Wia der letzten Füm vurm sterben is mei Leben an mir vorbeizogen und i hab mi wieder gfunden im Wirtshaus, im philosophischen Dialog mit an andern bsoffanan Hawara; und wieder amoi hama gred über den Unsinn unserer Existenz und mögliche Auswege. I hab immer die Ansicht vertreten, es is nie zu spät, zum umdrahn, er hat gmand, na, des hat kan Sinn mehr in unsern Alter, mia san z`deppert für a normales Leben und stecken zu tiaf in der eiganan Scheiße. Zu lang scho fahr ma auf dem Programm, unser Leben ghört dem Rausch.

Dann hab i zu eahm gsagt: "Du hast wengistens a Tochter, dei Leben hädert niacht a an Sinn." Auf des aufe sama glegen vurm Wirtshaus und ham graft, haben uns gegenseitig no tiafa in Dreck eine druckt, wäu des häd i ned sagen diaf`n. Des war sei wunder Punkt. Da isser öfter moi a bissl narrisch wur`n, wenn er fett war und ma hat sei Tochter erwähnt. Aber wurscht, der Wirt hat uns an Kibl Wossa über`n Schädl gschütt, mir haben uns beruhigt und weida gsoffen; oiso, weida garbeit, in unserer überaus wichtigen Funktion im Gesellschaftssystem.

Aber heut, wia i am Heisl gsessen bin und nachdenkt hab über seine Worte, hab i eahm scho ganz guad verstanden. Wenns`d so a Programm erst mit 55 oder 60 umschreibst, da is es Leben scho weitgehend grennt und vü gibt`s nimma, wos`d no besser machen kenntast. Da muaß`d scho tiaf graben, wenns`d an Sinn finden willst. Und wenn di dann dann no a paar andere Episoden zruck haun, die jetzt ned primär mit`n Alk z`tuan haben, wäu`s Sachen san, die an Antialkoholiker genau so passier`n kennan, dann is die Kraft drauß`n. Na, da hat er scho recht ghabt, der Hawara, vü Sinn hat`s ned, so spät um z`drahn. Zumindest find man ned leicht.

Aber i bleib trotzdem dabei. I hab angfangen, des Programm umzuschreiben und i bleib dabei. Voraussichtlich bis zum Tod, wenn i mi ned no amoi zruck programmier, wäu i do no drauf scheiß, ma waß ja nie.

Mei Kollega is scho furt, der hat`s gschafft, daß er si totsauft.

Des hab i ned vua, waß der Teifl wieso.

Na, a masochistischer Psychopath bin i ned, i kenn nur den Wert vom Hier und Jetzt.

Kann i a nimmer vü bewegen oder korrigieren, so hat des Leben trotzdem no sein höchsten Wert in der Gegenwart, um`s genau zu sagen: Jetzt, in dem Moment wo i des schreib, erkenn i voi bewusst den höchsten Wert und Sinn meiner Existenz. Ned morgen oder nächste Woch`n und a ned in der Vergangenheit, nur Jetzt. Und der Wert is natürlich a ned abhängig davon, obs`d Anerkennung findst von irgend an andern hüflosen Komiker auf dem gottverfluchten Planeten oder von ana Tussi, die am End womöglich glaubt, sie muaß di häckl`n und veroasch`n, daß glücklich wird mit dir.

Na, er hat do ned ganz recht, mei oida Hawara aus`n Wirtshaus. Es hod an Sinn. Aber nur, wenn ma si olle Leut vom Hals halt, die an owe zahn und a die, die an weida pushen und aufe druck`n woin, die Positivterroristen. Höher pushen, waß Gott wia hehre Zukunftspläne schmieden geht nimma. Da reicht die Zeit nimma und a ned die Kraft.

Nur Jetzt und Da hat`s Leben no an Sinn für an kinder und zukunftslosen Extschecherant`n.

Nur jetzt, in dem Moment.

Und a nur, wäus die Musi gibt.

 

[Moondance]

...also wenn Du nach diesem Thread noch ne Frau abkriegst..........

 

[LoneWolf]

...also wenn Du nach diesem Thread noch ne Frau abkriegst..........

Stören Sie mich nicht bei meinem morgendlichen Meditationen.


Werte Waldweg

 

[LoneWolf]

Na, da braucht`s a bissl mehr, als a Hobby oder irgend a Beschäftigungstherapie.

A bissl in der Luft umanander fotografier`n,
Schmäh führ`n mit die Freind oder sei Ratznloch a bissl renovier`n reicht da nimma.

Des is ganz nett, aber zwenig, wenn ma so a intensives Programm umschreiben wü.

Da brauchts die große Liebe.

Und find i`s ned in Dir, dann find i`s halt in mir.

 

[Moondance]

Stören Sie mich nicht bei meinem morgendlichen Meditationen.


Werte Waldweg

...ja hast recht, wollte Dich nicht bei Schei...en stören...

 

[Moondance]

, dann find i`s halt in mir.

nirgends sonst....