Der Grund, warum nix weida geht bei meiner Brautschau wird an jeden einleuchten, der a bissl mitdenkt.
Des is die Menschlichkeit in mir und die allgemeine Nächstenliebe.
Durch des, dass i christlich erzogen worden bin, liegt mir des körperlich/geistig/seelische Wohlergehen meiner Mitmenschen doch recht am Herzen. Des is a so, des hab i von der Mama mitkriagt am Weg, des is ma in Fleisch und Bluad übergangen und wer was anders behauptet oder mi drauf festnageln wü, dass i mi im Suff zeitweis a bissl wia a Charakterschwein durchs Leben bewegt hab, der kann si glei schleichen, bevur i`n treib. I brauch die Gnade ned von die andern Leut, die soin liaber drauf schaun, dass mit eahnare eiganan Dämonen zrecht kumman. Um die meinigen kümmer i mi scho in der angemessenen Weise.
Klar is mir als ehemaliger Christ ned nur des Wohl der Mitmenschen ganz allgemein, sondern des von meiner zukünftigen Geliebten im Speziellen ein ganz besonders großes Anliegen, weil des warad ja dann die Allernächste von die Nächsten. Wer des ned nachvollziehen kann, der is ned nur gratis in`d Schui ganga sondern eindeutig a no umasunst.
Die Konsequenz dieser Erkenntnis allerdings warad, dass mi erst gar ned näher kenna lernt, mei zukünftige Liebste.
Des is oiso durchaus a bissl a Teufelskreis, von dem i no ned waß, wie i den durchbrechen werd.