Oiso, i waß es ned... Ob er mi als Behausung braucht, des waß i ja ned. Des hab i a ned gschrieben, gell. I bins halt und da kann i gar nix tuan dagegen. Klar, wenn i amoi stirb, is er sicher ned obdachlos deswegen. Gibt eh no gnua andere Primaten auf der Wöd, in denen er hausen kann. Und ob er sich mit mir plagt, des kann i natürlich a ned wissen. Er hat ma diesbezüglich no ka eindeutige Beschwerde gechannelt. Aber ich mutmaße halt a bissl, wäu i ja ned immer der Bravste und der Anständigste war. Heut no gspür i die Schlechtigkeit und Verdorbenheit bis ins Gebein hinein und i kennt ma halt vurstön, dass des für`n Gott a bissl mühsam is, so an Primaten wia mi zu bewohnen. Aber so is er halt, der Gott... scheut keine Mühe beim Menschen machen.
Ma kennt ja a so sagen: I als Egomane, der i bin, bin natürlich der Widersacher Gottes. Eh klar. Wäu immer wieder will i was, was mei Untermieter ned wü und dann kumman innere Spannungen auf. Bin halt als Mensch, wia ma sagt, no ned fertig, no im Werden, hab no sehr vü gewöhnliche Primatenbedürfnisse und denk verhältnismäßig oft an Sex. Trotzdem ziagt er ned aus, der Gott. Der is a so. End und Bedingungslos in seiner Liebe, Treue und Geduld. Und konsequent isser, des is a Wahnsinn. Da kennt i ma a Scherzl abschneiden. Wenn der was anfangt, dann macht ers a fertig.
Und Widersacher sei kost vü Kraft. I bin bald am End mit mein Widerstand gegen Gott.
