Ewig miad
Dö Joahreszeit, dös woaß a jeda,
dö wiakt si' aus bei jed'n Weda
drum is's koa Wunder, dass ma's g'spiat
und johreszeitlich miad a wiad.
Im Frühjoah pockt oan, noch da Zeit,
ois erst's dö Frühjoahsmüadigkeit
und haut oan her, ma glaubt's fost ned,
dass boid vor miad glei goa nix geht.
Im Summa is' donn schuid dö Hitz',
dass ma' om Sond is' wei' ma schwitzt,
und zu nix fähig, wia ma's kennt,
wei' ois grod mehr ois schlapp si' nennt.
Da Hiabst und dös fia mehras zöht,
mocht miad wei' oan es Liacht scho‘ föht
und a dö Zeit, wos ma' jo g'spiat,
mit oan Schlog no' vaändert wiad.
Bleibt no' da Winta, d'koide Nocht,
dö a so monche miad no' mocht
wei' ma' im Finstan, dös is' g'wiss,
meist grod im Bett beweglich is'.
Do stöt si' mir jetzt echt dö Frog'
wonn oan dös Joah ned schoff'n mog.
I glaub' dös is' grod donn so weit,
min Onfong von da Urlaubszeit.
Adamas