Durch des, daß i eher a recht afocher Mensch bin, hob i ma`s natürlich a mit der Esoterik, mit`n Mystisch`n und Magisch`n immer recht afoch gmacht, wäu komliziert is eh scho gnua, des Leben da, auf da Wöd.
In mein System gibt`s kane Millionen Dämonen, für an jeden Schaß, der an druckt an andern; und Heere von Engel`n, die si verlur`n ham, in ana grausamen Schlacht, die tobt wenn die Sun scheint und brennt bei da Nacht. In mein esoterischen System gibts nur den an Universaldämon, der olle dämonischen Kräfte, die`s gibt auf dera Wöd, in sich vereint.
Mi hat er jo a mit`n Schmäh packen woin, hat si ois Engerl verkleidet, wos er zwischendurch immer wieder gern tuad, is ma erschienen und hat gmant: "Durt, hinter dein linken Schulterblatt`l sitzt der Dämon für dei unersättliche Gier. Der surgt dafür, daß`d ned gnua g´kriagst, egal von was, vom Geld, vom Wein, vom Vögeln, von der Lust an der Macht, wurscht. Hinterm rechten Ohrwascherl versteckt si der Dämon für dei Rücksichtslosigkeit, der di im schlimmsten Fall sogar dazua bringt, über Leichen z`geh. Am Schäd`l droben sitzt dei Selbstherrlichkeit, der falsche Stolz. Vertrau ma, i bin der gute Anführer des Himmelsheeres und Gott selbst hat mich herab gesandt, dich zu erretten."
Die Zerstreuung der Aufmerksamkeit nenn i des, in mein esoterischen System. Da probiert der große Universaldämon, die Aufmerksamkeit des Adepten zu zerstreuen, abzulenken vom Wesentlichen. Klar, daß ma eahm ned zu fassen kriagt. Und drum is mir in mein ganz persönlichen, esoterischen Wahnsinn für eine halbwegs erfolgreiche Neutralisierung immer wichtig gwesen, alle diese dämonischen Eigenschaften in mir selber zu erkennen und in diesen einen einzigen Universaldämon zurück zuweisen. Und i nenn den in meiner alltäglichen Dämonenpraxis "Dämon der niedrigen Beweggründe". Kurz DNB; das des halt a bissl wichtig a klingt.
Jo, und wias so is in da Wöd, sitzt der DNB ned nur in mir, schwer neutralisiert, doch niemals eliminiert. Der sitzt überall drin, im Parlament, im Großkonzern, hinter politische Aktivitäten versteckt er si, Lobbys bildet er, in der Kirchen verkräud a si... is a echtes Gfrett mit eahm. Ma wird seiner afoch ned wirklich Herr.
Aber neutralisiert, ja, des trau ma sagen, hab i eahm jetzt wieder, so halbwegs, alla und ohne der Hüf von der Hex oder vom Bardon. Natürlich wirken si die Erfahrungen, die i damals gmacht hab auf mei System aus, klar, sunst waradn`s ja wertlos gwesen. Aber i hab halt no vü eigane Erfahrungen dazua sammeln miaßen und den Weg für mi persönlich modifizieren. 20 Jahr hab i braucht, daß i den DNB in seine Schranken verweis, wobei i ma täglich vur Augen halten muaß: Schlafen tuad er nie. Immer wart er auf sein großen Auftritt.
Allerding hab i den schweren Fehler begangen, den DNB zu neutralisieren, ohne aber den EHM anzurufen, also den Engel der hehren Motive. Des hab i verabsäumt, wahrscheinlich, wäu i damals die magische Evokation ned glernt hab. Leider, aber so is. Jetzt führ i halt a Leben mit an halbwegs neutralisieren DNB, oiso, meine niedrigen Beweggründe halten sich, hoff ich zumindest, in erträglichen Grenzen - tägliches beten und bitten um Erlösung vom Bösen und Beistand und Schutz is unumgängliche Routine für einen ehemals Besessenen - aber eben a meine hehren Motive san sehr schwach ausgebildet, wäu mir der Kontakt zum EHM afoch fehlt. Und leider a jeglicher Ehrgeiz, diesen herzustellen, des muaß i ehrlicher Weise zuageben.
Wäu i afoch scheißdrauf bin, wegen der unerfüllten Liebe.
Des haßt, i kräu da jetzt herum in meiner Bude, solltert zsam ramma und wü mi aber ned wirklich vü bewegen. Wäu mir jeglicher Beweggrund abhanden kumma is.
Aber des wird si schlagartig ändern, wenn mei neiche Herzensdame endlich anruaft und sagt:
"Da bin i, was mach ma?"
