Na, des war die Frau Exgefährtin mit ihr`m fünfseitigen Liebesbrieaf, wos ma wieder mein alkverseuchten Charakter und die ganzen Schweinerein, die i mir im Lauf meiner Säuferkarriere geleistet hab, um die Ohr`n gschmissen hat. Die Wahrheit eben aus ihrer Sicht. Und ganz so unrecht hat sie nicht.
I muaß ja dazu sag`n, die Dame kennt mi seit 26 jahr und die erst`n drei jahr unserer gemeinsamen Zeit, da war i no voll drauf, am Benzin und da hat si die Höll mit mir erlebt, des is scho richtig. Bis i dann endlich aufghört hab, mit der scheiß Tschecherei.
Und sie hat ja recht; wenn i am Stoff bin, dann bin i a Anderer, a charakterlose, rücksichtslose Kreatur, aber trotzdem immer i selber, weil abstreiten kann i mi net. Und sie vergißt nix. Sie rechnet mir heut noch vor, was i vor 26 Jahr für Mist baut hab, daß i dazwischen 10 Jahr kan Tropf`n angschaut hab, des ignoriert`s ja permanent.
I was aber selber, daß i nix saufen darf, a ohne ihre Klugscheisserei`n, weil i was, daß mei Gwiss`n stirb`t, wann i sauf, und daß i mir dann um nix und niemand was pfeif. Und i was, daß i dann immer sehr lang brauch, bis ich`s wiederbeleben kann, mei Gwiss`n. I was, daß i a gottverfluchte Kreatur bin, wenn i auf Alk bin, da brauch i den depperten Trampel wirklich net dazua.
Und jetzt, wo sie weiß, das die Sue gstorb`n is, weiß sie natürlich a, daß i wieder drauf war, am Alk, wie ein Wahnsinniger, weil si was ja ganz genau, daß i meistens in Krisensituationen umkipp, und ihr fallt nix gscheiters ein, als das sie mir no am Schädel draufsteigt und auf fünf Seiten einedruckt, was i für ein Oaschloch bin, für ein gottverfluchtes. Und i Trottel muaß den Brieaf a no les`n.
Natürlich hat sie net unrecht, verbreitet keine Lügen, aber sie druckt mir was mit Gewalt eine, was i eh selber was und des vertrag i net. I mach mir schon selber genug Vorwürfe, wegen meiner Scheiss gottverfluchten Existenz und mir gehts drum, daß i wieder aufsteh, nach der letzten Wahnsinnsepisode. Und der Trampel kommt und haut mir an fünfseitigen Briaf übern Schädel, das i die Teuferln brummen hör, des pack i net.
Drei Tag hab i den Brieaf da lieg`n, i hab ja gwußt`, warum i ihm net lesen will. Dann siegt doch die Neugier und abwärts gehts, in den Keller, weil ma eh no net tieaf gnua unten san. Und dann fallt mir so a Scheißgereime ei, wiea die depperte Gschicht von di zwa Herzerl`n und i hau mir die ganze Stimmung zsam. Verflucht no amoi.
Na, i scheiß drauf, wirklich wahr. Für was i mi überhaupt no bemüh, nüchtern zu bleiben, nix mehr zu saufen und mi mit positivere Gedanken oben z`halten? I was es im Moment einfach wirklich net. I sollt mi lieber komplett wegräumen, des wär des allerbeste. Drei Flaschen Vodka beim Penny kaufen und a paar Tabletten ins Gsicht und fertig is die Gschicht. ma, hab i grad an Zurn in mir. Des is net sche.