A bissl Pathos...

[LoneWolf]

...zwischendurch muaß a sei, weu dauernd den schlampert`n Weana außehänga lass`n,
des is zwar ziemlich authentisch aber trotzdem ned komplett.

Des Pathetische ghört zu mir, wie früher da Rum in Tee.

Oiso, los geht`s, heut is da pathetische Dunnerstog bei mir; da wird nix garbeit.

Ich brauche kein Geheimnis aus meinem Leben zu machen,
denn mein Leben ist Geheimnis und wird es immer bleiben.

Ein Mysterium und unbeschreibliches Wunder zugleich,
das mir nie zur Selbstverständlichkeit verkommen wird.

Gezeugt von einem Vater, herangereift im Leib einer Mutter,
geboren voll erwachendem Lebenstrieb,
anders als das gewöhnliche Tier
die eigene Endlichkeit erkennend,
sie zu verstehen bemüht und dennoch
voll ungebrochener Lust am Leben,
bis zum letzten Atemzug...

Wäre mir dieses Dasein nicht geheimnisvoll genug,
würde mir das nicht zum Wunder gereichen;

wahrlich, ich wär ein armer Hund.

​

So, mei klana Anfall is vurbei, weida geht`s, im gewohnten Slang

 

[LoneWolf]

Heut war i auf ana Firmung eigladen, war ganz gmiadlich.

Manchmal allerdings, an so Tag, wia heut, wo i Leut triff, die wos zwischen 20 und 30 Jahr in feste Partnerschaften leben und die mitanander wos auf`s Fiaß gstellt haben, da frag i mi no:

Wo is nur?
Wo is die Prinzessin, die mei Herz besiedeln kennt,
die zu mir passt und die mi aushalt, so wia i bin
und mit dera i vielleicht no a bissl wos bewegen kenntad?

Aber die Anfälle psychischer Störung werden zum Glück immer seltener und immer kürzer; weu längst hab ich`s eigseg`n und sag ma:

Oida, wach auf, der Zug is ogfahr`n, bleib realistisch. Und außerdem:
A Chaot kann nie a echte Prinzessin aufreiß`n, a Chaot kann immer nur a Chaotin dawisch`n.

 

[LoneWolf]

Ned schlof`n kenna tua i grad und nachdenk`n. Nachdenken drüber, wie gschiss`n daß sei kenntad, wenns ned so gfäud grennt warad und wie guad daß is, daß so kumma is, wia sa si zuatragen hat, weu`s sunst am End no schlecht ausgangen warad.

Positiv denken nennt ma des.

 

[LoneWolf]

Die Sau hat nix in an Menschen drin verlur`n.​

​

Des is mei Meinung, jawoll.​

​

Raus mit der Sau...​

​

genau!

​

​

 

[LoneWolf]

Unzusammenhängende Zitate aus persönlichen Alltagsüberlegungen

Die Sau muaß auße.
Die hat nix verlur`n im Inneren von an Menschen.
Raus mit der Sau, genau...

Selten aber doch triff i Zeitgenossen und Innen, die kenntat`n fast zur Beleidigung werden, in eahnan Bemühen um die Intrige. Oba ois halbwegs nüchterner, vernunftbegabter Mensch steht ma da drüber und sagt si:

"Schad. Schad, daß`d so deppert bist und dei Energie so sinnlos vergeudest;
daß`d andere demolieren wüst und in dein Rausch ned amoi merkst,
daß`d da nur selber schadst."

Negative Gedanken san die schwarze Magie des Alltags.
Die gibt`s wirklich und die wirkt im Untergrund auf die Sö wie a schleichende Krankheit.
Aber wer sei Energie no dazua bewusst in an finstern Abgrund steckt,
der kann ka Licht ernten; des is a oida Huat.

Wer sei Kraft unbewusst in die Zerstörung der Liebe steckt, des ned merkt und leidet, des is a armer Hund.

Wer des aber vorsätzlich und voll Berechnung macht und si dabei a no wundert, daß nix Guades außa kummt dabei, der is a Trottel und sunst nix.

Wenn ma`s in da Liebe auf an Kampf anglegt hat und si nacher ois Verlierer fühlt,
dann wird`s woi so sei... dann hat ma verlur`n.

Hat ma`s aber ned auf an Kampf anglegt, sondern auf die Liebe eben...
dann is ma am End vielleicht a bissl enttäuscht,
oba ma wird si nie ois Verlierer füh`n.